Stefan Roth

Biografia

Stefan Roth ei naschius a Winterthur e carschius si ad Aadorf ella Turgovia. Oz viva el cun sia dunna a Bischofszell.
Suenter la matura egl onn 2000 alla scola cantunala a Frauenfeld ha el studegiu posauna naven da 2002 tochen 2004 alla scola aulta per musica e teater a Turitg.

Stefan Roth ha studegiau HaFa Directie tier Jan Cober ed euphonium tier Piet Joris al „Conservatorium Maastricht“ ella Hollandia. Egl onn 2008 ha el serrau giu cun success il studi dil „Bachelor of Arts in Music“.
Sco euphonist e posaunist collavura Stefan Roth biars onns ella „Liberty Brass Band“ dalla Svizra orientala e digl orchester d’instruments da flad dalla musica da giuvenils Kreuzlingen. Duront siu studi ella Hollandia era el commember dalla Brass Band Limburg.

Suenter dus onns da studi da master tier Ludwig Wicki, Dominique Roggen, Rolf Schumacher, Oliver Waespi e Thomas Rüedi alla scola aulta d’art a Berna ha el acquistau cun distincziun il tetel „Master of Arts in Windband Conducting“. Stefan Roth meina cun grond success igl orchester d’instruments da flad dalla musica da giuvenils Kreuzlingen, igl orchester d’instruments da flad sinfonic Kreuzlingen, la societad da musica Kradolf Schönenberg, sco era la musica burgheisa Untereggen e l’ Uniun da musica Sagogn. Ultra da quei ei Stefan Roth il menader musical dalla band da project „Philharmonic Winds“ – Igl orchester d’instruments da flad dalla Svizra orientala.

Intervesta cun Stefan Roth

Tgei instruments sas ti sunar? Euphonium, posauna e clavazin.

Daco eis ti vegnius dirigent ed eis buca staus semplamein commember d’ina uniun? Jeu hai sur 10 onns sunau en Brass Bands ed orchesters da musica ed havevel è bia plascher vid ei. Jeu vulevel denton transponer miu maletg dalla musica e quella alternativa dat ei en in orchester mo cun direger. Suenter la viseta dils cuors da dirigents ella uniun cantunala da musica Turgovia hai jeu surpriu egl onn 2001 mia emprema uniun da musica „Blechharmonie Kirchberg“. Lu sun jeu ius egl onn 2004 per miu studi da dirigent a Maastricht (NL) e naven da lu era ei clar, nua che mia via va. Ei suonda in studi da master el direger a Berna e momentan fetsch jeu in studi da master a Augsburg (DE).

Teidlas ti privat è autra musica? Naturalmein!

Tgei musica? Jeu teidlel fetg bugen musica d’orchester classica (suenter 1840) oravontut da Richard Wagner, Richard Strauss e Gustav Mahler e tut tgei che vegn suenter. Divertiment musical (vegls musical, Johann Strauss eav.). Musica populara (senza schlager popular!!!). Pop, rock e suenter ina strentga emprova era inagada club-music (cun pusseivel bia bass).

Tgei ei tiu instrument preferiu en ina musica da brass? Tgei damonda! Naturalmein igl euphonium ed il bariton. Daco, perquei ch’ei tuna il pli bi, ha la megliera vusch e gie… perquei che jeu sunel sez il pli bugen euphonium ni bariton…

Co eis ti vegnius tier l‘ Uniun da musica Sagogn? Jeu sun vegnius recumandaus avon in pèr onns dalla uniun da musica Sagogn da miu – da lez temps – docent d’euphonium Thomas Rüedi. Suenter ina viseta da Michael Cadruvi tier mei a Bischofszell eran nus fetg spert perina, che nus havein da far in project ensemen. Suenter quei sulet project ein plirs suandai. Il 6avel entscheiva fin da schaner 2017. Jeu selegrel sin quel! L’uniun da musica Sagogn ei ina uniun fantastica. Buca mo sin la moda musicala, mobein era sin la moda persunala e sociala.

Text: Linda Derungs