Brassorama

Naven da fin settember 2016 dat ei a Glion ina nova musica da brass. Ella senumna Brassorama ed exista da 18 scolars e scolaras, denter 10 e 15 onns, che havevan ni prendan aunc adina uras da musica ella scola da musica a Glion cun in instrument da stuors sut la direcziun da Hanspeter Bircher. Ils musicants ein da differents vitgs, numnadamein da Mustér tochen Cuera. Perquei discurrin nus ellas emprovas è mo tudestg, schiglioc capeschan buca tuts e tuttas tgei che nus stuein far. Il Brassorama exista ord 1 dirigent, 10 che sunan cornet, 2 che sunan es horn, 1 che suna bariton, 1 che suna posauna, 1 che suna euphonium, 1 che suna schumber e 2 che sunan trumbetta. Perquei che nus essan ensemen cun Cuera dat ei era da quels che sunan trumbetta, tier nus el contuorn dat ei denton negin che suna trumbetta en ina musica da brass, pér naven da Cuera.

Nossas emprovas

Nus vevan mintga secunda jamna emprova, la sonda la damaun ni la dumengia sera. Nus vevan denton buca adina cun quels da Mustér, perquei ch’il viadi fuss memia liungs per 1-2 uras emprova. Mintgaton eran nus denton era tuts 18 ensemen e savevan sunar nossas canzuns cun tuttas quater vuschs che eran lu cumpletas. Nus havein trenau per il concert da Nadal si tier las mungias ella baselgia a Glion. Leu havein nus gia sunau sco emprova generala. Quei concert era ils 27 da november 2016. Ei deva aunc auters che havevan sunau, igl orchesterAcorda ed aunc la Christmasband. Nus havein sunau 3 differentas canzuns: Blues Band, 3C Rock e Rushhour. Il pli bugen hai jeu sunau il 3C Rock. Bunamein mintgin da nus musicants e musicantas ha giu in solo. Nossa mondura era nuot special, mo nus havein vesiu ora tuts e tuttas medem. Nus havevan tratg en ina caultscha nera, ina camischa alva, soccas neras e calzers ners. Nossa emprova avon il concert era dètg buna, aschia stuev’ins suenter buca pli sunar en si ella claustra, quei ha gidau fetg. Aschia havevas pli bia temps da seconcentrar sin tei e semtgar tetez sil concert.

Finalmein concert

Finfinalmein era ei aschi lunsch e nus havein saviu entscheiver! Nus essan marschai en, mo in pign problem vevan nus aunc! Ils instruments dalla Christmasband eran enta peis a nus e nus essan buca vegni atras. En quei mument ha la quarta vusch stuiu improvisar spert. Jeu crei silmeins che negin ha sentiu che nus vein midau il plaz da vegnir en. Cura che nus essan sesi giu ed essan stai semtgai, havein nus entschiet a sunar l’emprema canzun Blues Band! Silsuenter ha la mungia informau davart il program e dalla crippa dalla sora Derungs che ha 95 onns. Suenter ha aunc il schef dalla musica da scola detg in pèr plaids! Lura havein nus sunau nossa secunda canzun, numnadamein la canzun Rushhour. Per quella canzun stueva la quarta vusch investar bia temps d’emprender da saver sunar ei, perquei che nus havein il bia mo da sunar sequenzas spertas da tuns, pausas deva ei els tocs bunamein mai. Cura che nus havein giu sunau a fin, havein nus directamein sunau il davos toc, il 3C Rock. Cun quella canzun havein nus era fatg in‘ agiunta, naturalmein buca l’entira canzun, mo d’ina certa part naven. Ella canzun 3C Rock haveva il percussiunist era giu in solo. Quel ha tunau dètg bein. Tier quella canzun deva ei zatgei special che la glieud, che haveva mirau tier, saveva da nuot. Ils solists ein adina stai sin peis da sunar. E tschels sesevan sco normal era, quei era buca per mintgin aschi in bien avantatg da star si e sunar aschia, en mintga cass buca per quels che havevan in grond ed in grev instrument. Star si mava, denton da star si e da tener igl instrument duront sunar era malemperneivel. Mo cun da quellas caussas ston ins s’endisar, ch’ins sto era far quei. Silsuenter eran nus a fin ed igl orchesterAcorda ha entschiet cun siu concert, alla fin ha la Christmasband cantau canzuns da Nadal. Cura che quei era a fin, havein nus tuts saviu ir a casa ed havein aschia giu in bi 1 d’advent.

text: Linda Derungs